O Pazo da Marquesa é un dos edificios patrimoniais mais emblemáticos do Concello. Solar do señorío de San Sadurniño creado en 1526, posteriormente convertidos en marqueses de San Sadurniño dende 1688. O edificio actual foi remodelado a comezos do século XX por María de la Natividad Quindós, "VII Marquesa de San Sadurniño, duquesa de la Conquista, marquesa de Gracia Real, marquesa de los Palacios, condesa de Cumbres Altas y vizcondesa de la Frontera". Durante o século XX o pazo e os seus refinados bosques e xardíns -case 100 hectáreas- foron visitados por viaxeiros ilustres, entre eles Alfonso XIII, membros da aristocracia española, políticos conservadores, ademais de escritores e artistas da corte de Madrid. O artista visual Anxo Santomil recreou o tempo de esplendor da Marquesa en "A Marquesa e o Pazo", realizada na 6º chanfainalab. En 1953, á morte da Marquesa, o pazo pasou a mans da orde relixiosa Hijas de Cristo Rey e transformado en colexio e hospicio. No ano 2010 recupera a titularidade pública e comézase a súa rehabilitación. En xuño do 2014 pasou a seren definitivamente a sede do Concello de San Sadurniño.