Nace "Unión Patriótica" de San Sadurniño

San Sadurniño, 1924

O domingo 14 de decembro de 1924 constitúese en San Sadurniño o partido “Unión Patriótica”, o único partido legal permitido baixo da ditadura de Primo de Rivera. En palabras de Calvo Sotelo, tratábase dun partido "organizado desde el poder y por el poder" e o seu fin primordial era a organización dos sectores mais conservadores da dereita social-católica que apoiaban á Ditadura de Primo de Rivera.
Unha circular de agosto de 1924 do gobernador civil “instaba” a que se creasen agrupacións locais do partido na provincia de A Coruña. O alcalde, Avelino López Sisto, convoca nas dependencias municipais o 9 de outubro de 1924 a 57 persoas para formar a comisión organizadora local de "Unión Patriótica". Moitos dos asistentes son ex-alcaldes e concelleiros do antigo partido conservador, grandes contribuíntes do concello, industriais e propietarios de negocios e terras. Por fin, o 14 de decembro constituíase formalmente "Unión Patriótica" en San Sadurniño, segundo esta acta oficial que podes descargar en Documentos. O seu presidente sería o empresario emigrante retornado do Brasil, Matías Fernández Murias, natural de de Cabanas, mais casado en 1906 en San Sadurniño con Avelina García Fraguela e onde constrúe casa en 1913. O home clave do partido en San Sadurniño será o vicepresidente Manuel López Sisto.
Algúns militantes deste efémero partido –disolverase en 1930- participarán activamente nos partidos dereitistas durante a Segunda República e apoiarán ao bando sublevado durante a guerra civil, desenvolvendo responsabilidades durante a ditadura franquista. Na imaxe, selo de Unión Patriótica de San Sadurniño.