"Estruturas. Apuntes de San Sadurniño"

San Sadurniño, 2023

7ª Chanfaina Lab (10). Estrea: venres 21 de abril do 2023
Realización: Raquel Álvarez
Son: Samuel Forcada
Violista: Juncal Castro
Sinopse: “Esta peza é o rexistro dunha expedición. De percorrer e descubrir un sitio novo. Para iso, utilizamos un micro para a captación dos sons atopados, e dúas cámaras: unha Minidv e outra Super 8. Con elas inmortalizamos as estruturas atopadas en San Sadurniño, cun especial interese nas construcións de acubillo.”
Duración: 5' 25"
Gravado e filmado en San Sadurniño co gallo da 7ª Chanfainalab.




Raquel Álvarez, (Vigo, 1998), acadou o título de técnica en realización audiovisual pola EISV e graduada en Belas Artes pola Uvigo. Leva realizado varios traballos relacionados coa dirección de arte, vídeocreación e instalacións. Tamén, formou parte da asociación cultural Fuck This Studio e de Percal Lab , un evento baseado en xornadas de obradoiros ao redor da captación analóxica e á reprodución da imaxe real. En agosto de 2022 é bolseira na convocatoria Future Stories co seu proxecto “Encontros e agochos” onde aborda o concepto de refuxio a través do tecido.

Raquel achegouse á San Sadurniño coa vontade e mirada de exploradora. Non saía moi ben o que ía topar: "O inicio foi un pouco improvisado, levábamos moitos aparellos para xogar. micros, cámaras de varios formatos, lanternas, etc. Levei de acompañante ao meu amigo e músico, Samuel Forcada, co que teño traballado en varias ocasións. Aos dous gústanos experimentar coa imaxe e co son, e atopar unha tensión entre as dúas cousas. Así pois comezamos a perorrer San Sadurniño co coche, parando cada dous por tres a inspeccionar o espacio. Nos últimos anos, a miña teima como artista xira entorno a idea de construción e refuxio, polo que as estruturas que máis me chamaban a atención son esas que estaban feitas para acubillar a persoas ou cousas, para protexelas.
Nunha primeira montaxe percibimos que as imaxes relacionadas coa maquinaria tiñan moita tensión de por sí. Os brazos mecánicos semellaban os dun monstro. Por iso, quixemos darlle máis epicidade mesturando esa experimentación do son directo, coas notas dunha viola"

"Estruturas. Apuntes de San Sadurniño" é un rexistro observacional realizado dende a ollada allea sobre lugares e estruturas que a veciñanza de Sansa ten diante dos ollos todos os días, pero que non se "ven" porque están integrados na paisaxe cotián: "Penso que esta peza inscríbese dentro do experimental e o documental, xa que ten un carácter descritivo pero feita dende o xogo. Con ela gustaríame que o espectador se deixara levar polos seus sentidos, que poda sentir un anaco deses lugares a través dos ollos e dos seus oídos". Coidamos que é un xeito de achegármonos ao devalar do Concello dende unha perspectiva pouco habitual, a través da ollada desta novísima artista visual que nos reta a remirar a nosa paisaxe dende o seu propio punto de vista. Gocemos coa viaxe.
Fotografías. Cesar Galdo.