"A pena de Vicente"

O Forgoselo, 2024

8ª Chanfaina Lab (5). Estrea: venres, 15 de marzo do 2024
Guión e dirección: Abel Vega
Sinopse: “ Vicente Penabade Lage naceu en 1950 na Toca (As Somozas) e faleceu en Neda no 2021 aos 71 anos. Pasou a adolescencia en Racamonde de Abaixo, logo traballou como taxista durante moitos anos e ao cabo, decidiu vivir para sempre no Forgoselo”.
Duración: 5' 39"
Gravado na Pena dos bois, Forgoselo, parroquia de Igrexafeita, dentro do programa da 8ª Chanfainalab



Abel Vega (Igrexafeita, 1958).
Abel traballou arreo durante toda a vida como albanel, mais unha enfermidade laboral apartouno do seu oficio. Inquedo e activo, cunha curiosidade sen límite, foi durante varios anos o presidente da Asociación Veciñal “Adiante Igrexafeita”. Abel tamén é acordeonista ocasional, gran cociñeiro e experto en manualidades de todo tipo. Aos seus 60 anos e pico, segue a vivir unha segunda xuventude ao gravar vídeos con vocación didáctica, nos que "mira" coa cámara todo o que lle resulta familiar, en definitiva, todo canto o envolve. É un cineasta afeccionado que está a videocartografar a súa parroquia, sorprendendo coas súas creacións audiovisuais e recibindo ao tempo numerosos eloxios dos cineastas asistentes á Chanfainalab. Aprendemos xa a facer pan, descubrimos os muíños de Igrexafeita, as pedras do Forgoselo, as fervenzas do Río Castro, a feroz vida salvaxe no interior dun formigueiro, un avespeiro, ou como eran as "casas de antes". Imaxes e sons que perpetúan a memoria local tanto a nivel patrimonial como etnográfico. Podes ver algúns dos seus filmes en Fálame de San Sadurniño para comprobar o seu amor polos fermosos recunchos da paisaxe humana e natural da súa patria da infancia, a querida parroquia de Igrexafeita e tamén da Serra do Forgoselo da que é un auténtico erudito.

Abel Vega é unha institución da Chanfainalab, o noso chanfaineiro máis veterano e prolífico. Un home imprescindible pola súa bonhomía, retranca e sabedoría; diante de calquera dificultade ou incidencia, todo vaise resolvendo co enxeño de Abel. Como en edicións anteriores, está en todas partes, axudando a quen o precise. Para el non existe a palabra non. Podémolo ver nas pezas dos compañeiros como "O pano de seda" de Kevin Lorenzo ou en "Pedro Chosco" de NaraíoMedia. Nesta edición Abel recupera a súa peculiar e orixinalísima mirada documental: o estilo "abeliano". A espoleta da peza agromou nunha viaxe ao Forgoselo para botar unha man a Felix Brixel en "A Terra é vella". Unhas flores frescas na Pena dos Bois alertaron o seu instinto de que alí había unha historia: "Cando fomos alí picoume a curiosidade, que facían alí aquelas flores entre os penedos? Primeiro fun a preguntar a Racamonde de Abaixo e deseguida púxenme a indagar sobre Vicente Penabade. Localicei aos seus fillos que me deron todo tipo de facilidades para documentarme. Iso si, a gravación estivo ateigada de incidencias técnicas que me obrigaron a ir ata o cumio do Forgoselo varios días, mais ao cabo puiden rematar a peza".

"A pena de Vicente" é unha sentida lembranza da pegada no territorio dun home que xa é parte do patrimonio inmaterial do Forgoselo. Se en traballos anteriores, a retranca de Abel provocaba a risa dos espectadores, neste pretende transmitir a emoción polo recordo de quen foi - e é- habitante do Forgoselo: "Eu síntome orgulloso e moi contento de facer esta peza. Coido que é un xeito de manter viva a memoria dun home. Ademais é un bo agasallo para os netos e os fillos de Vicente Penabade. Mesmo considero que é un xeito de renomear un fito da paisaxe do Forgoselo que ben podería chamarse tamén a "Pena de Vicente". Así pois, fagamos caso da recomendación de Abel. Na Chanfainalab estamos fachendosos da consolidación do cineasta de Igrexafeita e que, edición tras edición, nos faga sorrir e tamén conmover como con esta historia dun veciño que decidiu vivir para sempre entre nós.
Fotografías de César Galdo.