O castro de Riboira

Riboira, Lamas, 1

O castro de Riboira de Lamas, -“terra ás beiras dun territorio pantanoso”-, forma parte dun complexo sistema defensivo da Idade do ferro, composto por cinco castros que protexen e controlan o territorio do Val do Xuvia dende unha altura similar. Tres deles están situados nas ladeiras do Monte Rapadoiro: San Sadurniño, Riboira e Redo, franqueados no suroeste polo Castro Rupiallo, e no sureste polo Castro das Croas de Ramil. Ao norte conta co apoio defensivo dos castros de Bardaos, Escoitadoira e Castrelo xa en Santa Mariña do Monte.
Polo seu emprazamento o Castro de Riboira debeu acadar unha relevante importancia económica, xa que disporía dun gran antecastro ao sur, adicado por enteiro á gandería (topónimo Currás) . Quizais fose un espazo especializado nos cabalos, ovellas, vacas e outros animais. Segundo contan algúns veciños, no recinto de Riboira topáronse dende espadas e numerosos fragmentos de cerámica ata fíbulas, restos de metal e algún muíño de man. Ademais consérvanse algunhas lendas sobre o recinto, a pesares do seu abandono nos últimos anos. Podes baixar mais información, esquema e mapa en documentos.
Na fotografía, castro de Riboira dende O Carballo